28.11.10

إبن مين إنت؟

إذا منطلع سوا على أيّ ضيعة بهالجبال اللّبنانيّة ومنستكشفها شويّ، 
منلاقي إنّو عنّا أحلى بكتير من "خمس دقايق من البحر للجبل"...
 
عنّا غابات ومناظر بتاخد العقل، بتنسّي الواحد أضخم محكمة دوليّة وأوحش حرب و"أسكس" زعيم
وأحلى "عيش مشترك"... يعني شي بِمجّد الخالق.

وعنّا كمان هيدا العمّ اللّي في منّو بأيّ ضيعة مهما كانت طايفتها
وبِكون قاعد قدّام الدكّان يلّي بتتوقّف عندو لتشتري ميّ إنت وطالع طلوع.

"مرحبا عمّ. انشاللّه كلّو تمام؟"

بعد ما يتمعّن فيك ويفلّيك: "أهلا"

بتتبضّع ومزعوج لأنّو العمّ لاحقك بنظراتو.
بتخلّص وبتحطّ قنينتين الميّ والكمّ شوكولا وبسكويت يلّي شتريتهن ليصير الحساب يحرز شويّ.
(هودي ما بتلاقيهن بالمدينة، شي شغل تركيا، شي شغل سوريا، شي شغل إندونيسيا)

"شو بتأمرنا عمّ؟"

بيحسب وبِعدّ وبيرجع بيحسب وبِعّد: "ألفين وسبعميّه وخمسين"، بعدو مبوّز.

"تفضّل. ممنونك عمّ..."

"أهلا، من وين جايين من غير شرّ؟"

"والله من مزرعة يشوع بالمتن "

العمّ بيضحك سنّو وبِكفّي:
"إبن  مين إنت؟"

هيدا السؤال الأزلي مع كذا إحتمال:

١. العمّ من أعزّ الأصحاب مع بيّك وبتعلق لشي ساعة تحكي معو
وبضيّفك بالآخر "طربوش" (راس العبد).

٢.العمّ بيعرف عمومتك وبتعلق لشي ساعة تحكي معو
وبضيّفك بالآخر "شيكلتس".

٣. العمّ بيعرف المختار اللّي توفّا من ٥ سنين وإنت ما بتعرفو أصلاً
وبتعلق لشي ساعة تحكي معو وبضيّفك بالآخر تفاحة.

٤. العمّ شكلو خرفان وفكّر إنّو عِرِف ضيعتك وبتعلق تسمع خبار لساعتين
عن ضيعة غير ضيعتك  وبضيّفك بالآخر بونبونة.

المهمّ إنّو ضحك سنّو.

والأهمّ إنّو "إبن مين إنت؟" فتحت بُعد تاني فشر تلاقي بأيّ سلسلة جبال بأيّ بلد تاني بالعالم.

أي لاف ليبانون.

2 comments:

  1. I love it !!!! chta2na la hol echya !!

    ReplyDelete
  2. HAHAHA !!أي لاف ليبانون تووو. great post ballouta :)

    ReplyDelete

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.