11.12.10

ذا "سكسي" سيزُن

إهتياج شعبي هائل بسبب هذا الطقس "السكسي" أدّى إلى وقوف السير لساعات عدة في وطننا الحبيب لبنان.
وهيدا طبعاً دليل صحّة.

برافو.

هلّق لننتقل للتفاصيل "السكسي":

- الجورة السحريّة:
عبارة عن وادي متقمّص بِجورة وبسّ تنزل في... إيه بتضلّك.

- الجورة المستحيّة:

مستحيّة لأنّ ما بتشوفها بحكم إنّها مغمورة بالميّ.
هيّي بنتها للجورة، بغنّجوها كمان "جويرة" بسّ مفعولها كبير.

- البحيرة المفاجئة:
هيدي متل السراب بسّ الفرق إنّها حقيقيّة وفي منها كتير.
عمقها بيستقطب أغرب مخلوقات المحيط الأطلسي وكلّ السيّارات يلّي مش من بيت "هامر".

- هدايا المدينة:
أوه...
هودي ما بتشوفن إلّا وخابطين عقزاز سيّارتك أو بخلقتك.
هنّي كانو معلّقين على شي سطح أو عامود أو بلكون أو كميون.
إيه. بقا بيجي الهوا "السكسي" وبيصير "يهديهن" عن بو جنب للموجودين بإحدى الأماكن أعلاه.

يعني تخايل معي يا صديقي لوحة إعلانية لماركة "سوتيانات" بتحطّ بكلّ لطافة على سيّارتك.
في أحلى من هيك دفى؟
وإنتي يا أختي المرأة هيك شي لوحة 14x7 متار لجغل مش لابس إلّآ "بوكسر" تطمّك عالأوتوستراد؟
رومنتايك!

- طريق الحرير:
إذا بتقطع بكلّ التفاصيل "السكسي" لازم تختمها بهيدي.
عبارة عن طريق زِفتها متل الحرير بيتفاعل مع الميّ وسواقة المدامات وبيولّد "أكشن".


منيح إنّو إجت هالعاصفة لنفرح كشعب ونترك مجال لكبار "المفكّرين" والمحلّلين المحليّين
"ينظرو" بهالويكيليكس ويشوفو إذا المحكمة الدّولية عاملة بابا نويل السنة لـ"ولاد المنطقة"...

آخرتنا عويصة يا "سكسي" إنتو...

3 comments:

  1. 3ajabetne "hadeya l madine" aktar shi hehe..
    100%!

    ReplyDelete
  2. wel kheir la eddem. Iza badna nchouf el côté positif, sar fi 3enna concept jdid lal land art! w chou badna a7la min heik?:)

    ReplyDelete
  3. akchin.. sexy.. difi2..
    as samar said, w elkheir la 2edem! :P

    ReplyDelete

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.