26.12.10

الرجاء

آخر "بوست" لهالسنة رح يكون من أحد قرّاءنا: ميراب
منشكرك على هالأفكار الحلوة وعلى أمل تكون سنة ٢٠١١ كلّها رجاء.
انشاللّه بتضلّكن كلّكن بصحّتكن
أسرة توم-إكسترا

Our last post for this year is from one of our readers: Mirab.
Thank you for the ideas you're sharing, hoping that 2011
would be a year filled with hope.
Good health and love to all.
the tøom-extra crew
----

كنت عم إتأمّل هالعالم حواليّي وراقب وجوهن وتصرّفاتن.
غريب كيف ورا كلّ وجه مخبّى سرّ كبير؛ وإذا بتسمح لمخيّلتك تشتغل بالوقت ذاتو مع مراقبتك
بتصير تشوف قدّامك أفلام حيّة وبتحسّ حالك للحظات أقوى من ستيفن سبيلبيرغ...

على كلّ وجّ بتختلف العبارة وأكتر شي بيخلّيك تتعجّب وتسأل حالك ليش،
هوّي التناقض يلّي ممكن تشوفو على وجوه شخصين قاعدين حدّ بعض:
 واحد بتلاقي غايص بسلام وفرح وواحد تاني بتشوف على وجهه الموت ونهاية العالم...
والغريب إنّو إذا برمت العالم كلّو رح بتلاقي إنّو هالتناقض مملّى الدني.

غريب... بلحظتها صرت فكّر شو هوّي الشي يلّي بيعمل كلّ الفرق؟
 ولمعت براسي فجأة كلمة: الرجاء! إيه نعم الرجاء!
الإنسان يلّي عندو رجاء ما في شي ممكن يشلّو السلام من قلبو ولو حتّى كان عالمو كلّو أسود
وكلّ شي حواليه عم يجرّو للموت واليأس، هوّي الإنسان يلّي بقلب هالنفق الأسود قادر دايمّا يشوف النور الخفيف بآخر النفق.
والحلو بالرجاء، إذا منرجع للغة الفرنسية منشوف إنّو ما إلو نقيض يعني
 Esperance
 ما إلا
 “desesperance”
على عكس
espoir
يلّي نقيضها
desespoir.

الأمل إلو دايمًا خيبة أمل، أمّا الرجاء فهّوي لأنّو مش من هالدني، مش ممكن إلّا إنّو يعطي الفرح.
هوّي الأجنحة يلّي بتخلّينا نحلّق ونطير.

بتعرفوا شي إنّو في كتير حيوانات عندها جوانح ولكن ما بتستعملها إلّا بحالات إستسثنائيّة لمّا تكون بخطر، وبأغلب الأوقات هالحيوانات بتمشي على إجريها.
تخيّلوا معي صيّاد لاحق هالحيوان بدّو يقتلو وبيوصل لمحلّ ضيّق في سياج عالي وبينزرك الحيوان وبيشوف الموت قدّام عيونو بس بهاللحظة بالذات، بيفرش هالحيوان أجنحتو وبيطير وبيعبر للميلة التانية... هيدا هوّي الشي ذاتو يلّي بيسمحلنا الرجاء نعملو.

العبرة؟
إذا عندكن رجاء يا جماعة فيكن تحوّلوا حياتكن دايمًا لشي حلو.
فبالرغم من كلّ الجيّي العايشين فيا بهالبلد وبالرغم من كلّ التخويف والتهويل والتنصيب والسرقة والإحتيال وفقدان الأمل، فتّشوا عن الرجاء يلّي وحدو رح يخلّيكن تحلّقوا وتعيشوا بسلام

No comments:

Post a Comment

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.