11.1.11

حلّة مفيدة

 مع بداية هالـ٢٠١١ صرت فكّر بقضايا مصيريّة وعميقة لجرّب أوصل لشي حلّ يريّحنا كبَشَر عامّةً وكَلبنانيّين خاصّةً.

فكّرت كتير وتأكّدت آخر شي إنّو أفضل طريقة لنرتاح ونريّح
ونمشي على الطريق اللّي بتخلّينا نصير شعب

(الرّجاء العودة هنا إلى
النقطة "٥")
 
لازم نوقّف نحضر "أخبار".

نعم، لازم نوقّف نحضر أخبار وأهمّ شي الأخبار المحليّة يلّي أكترها بيبلّش:

"في بلادٍ ضاق فيها العيش وحلا فيها الإستنباط
ترعرعت فيفي اللّيفي وذهب العيش المشترك إلى التواليت
حيث اللّعبة الدوليّة تُطبخ ولا ريحة تُشمّ أو دخان يُرى...
هل انكسر الحلم؟... المزيد بعد الإعلان"


أنا صراحة ولا مرّة بفهم شي من هالمقدّمات الزجليّة السوريالية
و بصير إسأل بيّي لشوف إذا هوّي فهم... بكون غافي.

لشو دخلكن هالمقدّمة المعقّدة يلّي ولا مرّة بتوصّل لشي بِفيد؟
وكلّ مرّة بتحسّسنا إنّو نحنا هبل؟
شو ناقصنا بعد نحسّ حالنا هِبل؟
يلّا روح... بلاها المقدّمة.

منروح لصلب الموضوع المعروف أيضاً بالأخبار.
بلي تسترها ستر استحليت شي مرّة إسمع شي منيح خاصّةً بـ"الأخبار المحليّة".
نعي وتبويم وقرط حكي وكاسيت صرلو من "عهد الإستقلال" بيبرم وبِعيد حالو
وعم يمغغغغغغغغغغغغطططططططططططططططططططططططططططططططططط.

أو إذا ما كان تبويم بِكون "هوائي" (يعني متل العم ياكل هوى):
"زار ممثّل سلطنة الكوسى الفرنجي لبيبوس القدحجيت وزير الدولة رفيف الخنقدجي
وتداولا المسائل الحسّاسة المحليّة والإقليميّة واستعرضا سُبُل التضامن والتعاون بين البلدين وبعد الإجتماع الذي دار لمدّة خمس دقائق لكي يتمّ تصويرهما من كلّ الجهات، انتقل الفهلويّان إلى مائدة غداء غير شِكل أشرف عليها الشيف أونطوان شخصيّاً وأكلا وشربا وضربا كأس لبنان (ويلّي خلّفو) حتّى الإنمغال".


يلّا قومو لنفوت ننام وبلا كترة حكي وفرمانات إخباريّة.
هيدي الأخبار ما بتفيد، سمعو شي تاني بِفيد
أو عملو شي تاني... ولو كان ما بِفيد

4 comments:

  1. i can't remember which country made its revolution by turning the tvs towards the windows, so that soldiers can see that they're not watching the news anymore and it worked.

    i've always thought that if i had my own project mayhem (in reference to fight club), it would be to bomb all kind of media (mar2iyya, masmou3a wa maktouba.)

    imagine that nobody listened to our politicians, would they still have any more reason for their constant barking? we are the reason.

    ReplyDelete
  2. It was in poland...You are 100 % roqoqo !

    Rana

    ReplyDelete
  3. We're not trying to be "ahdam men 7ada"
    but thank you for the comment !

    ReplyDelete

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.