1.2.11

هلوسات حالم

ما تواخذوني هالمرّة شويّ جدّي، بس هيدا التدوين مُهدى إلى عالمنا البائس.

تخايلو متلاً بسّ تقومو من النوم عبُكرا، تبتسمو،
وبكلّ سلاسة تتحلّل غرفتكن وتصيرو "كما خلقتني يا ربّ" بقلب شلاّل ميّ فاترة.
بيقطع رفّ بلابل، "بِرِشّ" عليكن "شامبو" و"جل دوش"، وبتتحمّمو.
بتطلع شمس الأمل بتنشّفكن من دون ما تنزعلكن تسريحتكن مهما كانت.
كلّ الميّ اللّي استعملتوها بتتكرّر بمحطّة زغيرة وبتطلع على "مكنة" القهوة،

بهالوقت بيتحلّل الشلال وبتصيرو بغرفة الطعام بوجّ شبّاك مطلّ على سهول خضرا.
تيابكن لبستوها بمجرّد ما فكّرتو فيها.
ومع القهوة بتظهر الترويقة المفضّلة اللّي عقياسكن، بلا فجعنة.
بمجرّد ما تخلّصو الترويقة، بيختفي كلّ شي وبتضهرو من الشبّاك.

بيقطع ذئب مجنّح مهضوم، بياخدكن على مكان شغلكن.
شو وظيفتكن بتسألوني؟
إنتو المسؤولين عن حفظ إستقرار الإبتسامة بمنطقتكن وهالشي عبر التفكير بصور حلوة
ما فيا بشاعة وظلم وقهر وفقر وكره وإستبداد وقمع وضرب ونهب وسرقة...
مقابل كلّ شغلة بتصير و بتخلّ بِميزان الإبتسامة بتفكّرو بِشي منيح، حلو، رايق، في سلام، في محبّة.

عالساعة ٤ بيرجع بيقطع الذئب المجنّح لياخدكن على ساحة كبيرة فيها من كلّ الألوان والأجناس.
الكلّ مبسوط والسما لونها من لون الدهب الممزوج باللّون الزهري والأخضر المزرقّ.
بنصّ الساحة في كيس كبير و قدّامو في صفّ طويل.
 
بقلب هالكيس، في طاقة زغيرة وكلّ شخص بيقطع، بحطّ راسو فيها وبِبلّش يبكي.
بيبكي على كلّ المآسي اللّي شافها خلال النهار:
 
من البهيم اللّي سايق أجدد سيّارة وعم ياكل فول ويكبّ، مش بس على طريق ما بيعرف قيمتها، كمان على ولاد عم يركضو ويشحدو ومش عارفين لشو عيشتهن،
 
إلى الحيوان اللّي مفكّر شعبو رح يضلّ يعبدو لو جوّعو وباعو ورجع اشتراه بأرخص وبالآخر فنتر عليه،

إلى العدم اللّي بوصّل بيّ أو إمّ يقتلو ولادن ويرجعو ينتحرو.

 
على الساعة ٧، لمّا تكون كلّ الشبيبة خلّصت بكي، بيتسكّر الكيس وبيجي تنّين أسود بيحملو وبيطير في فوق السهول الخضرا. بيرمي بالهوا، وبنفخة ناريّة بيفقعو لينهمر على الأرض.

بغمضة عين، الكلّ بيرجع على شلّالاتو الفاترة، ومن بعدها على غرفة من قطن.
شي إنّو تنامو على هالقطن، بتعبا كاسة النبيد الفاضية وبتشربو لتنامو...

4 comments:

  1. "fetra"? but you like it cold! :P

    والله يا سماح يمكن حلو لعم بت قولو, بس إذا كل شي هلقد سهل و سلس من بطل ننبسط بل اشيا

    but let's keep ~our super power~
    (http://lemontree-jess.blogspot.com/2010/06/our-super-power.html)

    ps: men wekhzak ;)

    ReplyDelete
  2. I re-read again...Thx, I escaped for few minutes:)

    ReplyDelete
  3. Samah surtout n'arrête pas d'halluciner(mais pas durant un business meeting) et d'écrire. c'est un vrai plaisir de te lire. Tu devrais écrire un livre avec des illustrations extra!

    ReplyDelete
  4. Glad it helped you escape Keyrouz.
    Thank you Samar for your encouragements!

    ReplyDelete

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.