27.2.11

Desert rose

كلّنا عنّا اصحاب بدبيّ وسامعين اخبار كتير عنها: مدينة المولات والأبراج، الشركات والبترودولارات. بهالبوست ٢ منّا رح ينظّروعليكم ويخبّروكن بشو الهمتهم هالمدينة:

من بعد سنتان بدبي، وهلأ سنة ونصف باوروبا ببلد الحياد والحداد، عم إرجع لا ورى وفكر بكل شي كنت ما حبو بدبي وهلأ عام اتمنى إرجع عيشن، غريب كيف مدينة بتتحول وبتصير انسان أو شي بتشتقلو وبتحلم تمشي بالطرقات وترجع تشم نفس الروايح وتعيش نفس اللحظات مرة جديدة. اشتقت امشي بال-MALL وتفوح ريحة العود بشعري، واشتقت أطلع بالتاكسي وتفوح ريحة ما بعرف شو هوي فيي ( لأ ما كتير اشتقت ) ، اشتقت يصير معي رجفي بس إسمع YES MADAM مع روايح سبيسيال إفكتس أو إسمع YES MAAAAAM ONE LATTEEEEEE، اشتقت شوف الانجليز طارئين سكرة الساعة 8 الصبح، واشتقت سوق على اوتستراد واسع وإدفع 700 درهم رادار، واشتقت يكون عندي أصحاب من 5 جنسيات مختلفي، واشتقت أحضر سينما، أعمل سكي، وإرجع اتغدى  لبناني و اتعشى ياباني بلا ما انهز من مطرحي واشتقت شوف الشمس عم تغيب أنا وعم إشرب Mojito ب-360. أدي كنت عم صلي تفل من دبي هلأ إشتقتلى، اشتقت لل تنوع، لل حياة السهلي لل شمس، للشوب للرمل...ضيعان ما يكون في أشياء ثقافية أكتر بدبي، كنت رجعت عيش عطول يمكن...

------------------------------------------------------

من جمعتين رحت على دبيّ لخمس ايام للمرّة الاولى.
كنت متوقّع شوف مدينة كبيرة، طلعت صغيرة جدّاً. ولكن كلّها وكلّ صغرها، شفت فيها (متل اوروبا) ناس من كلّ الأشكال والألوان: اوروبيين، امركان، هنود، صينيّين،...
يعني بالمختصر الشي يلّلي ناقصنا بهالبلد: تنوّع الحضارات.

بلبنان عنّا ۱۸ طايفة (يا مشالله) ولكن اذا بتقعد مع أيّ جلبوط لبناني، بيحكيك عن نفس الشي: سياسة، وين سِهر مبارح ووين سهران الليلة، شو الهواية التفشيخيّة الجديدة اللي اكتشفها مؤخّراً، ... يعني فيك تمدّ حديث خمس ساعات بلا ما تتعلّم شي الو معنى.
ضيعان ما يكون في أشياء ثقافية أكتر بلبنان، كنت رجعت عيش عطول يمكن...

1 comment:

  1. Agree 100% particularly for 7adiss of Lebanese جلبوط !

    ReplyDelete

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.