20.5.11

Quote Dissection 3 : شو في ما في

هالـ"شو في ما في" عبارة منسمعها بكلّ الأراضي اللّبنانيّة
وبتلخّص حقيقة لبنان السرياليّة*.

إنّو كيف "شو في" و "ما في"؟!

ما إذا "في" مش معقول يكون "ما في" والعكس صحيح.

الحاصل إنّو هالـ "شو في ما في" بتتجلّى بكلّ شي بهالبلد:

١. كيف تلات أرباع العالم، إذا مش أكتر، عَحفّة الفقر
ومعاشها أنجأ بيقضي حاجتها الأساسيّة وهالمطاعم بتضلّ مفوّلة ليل/نهار-٢٤/٢٤-٧/٧ ؟
"إخت هالمعاش وهالعيشة الزفت وهالدولة!
قومي يا مرا تنروح نأرجل شي محلّ!"

٢. ليش كلّ واحد بالمؤسّسات الحكوميّة من زغيرُن لَكبيرُن بيِنصُب؟ (على شرط بطريقة نظاميّة).
" إذا بتريد اشتري ٥ طوابع ١٠٠٠ ل.ل. ورجاع لعندي."
" آه إنّو بِكلّف إخراج القيد ٥٠٠٠ ل.ل.؟"
" لا، عندك ١٠٠٠ للمعاملة و ٤٠٠٠ كرمال ما تنطُر."

٣.
ليش الإستذكاء المؤدّي إلى الإستهبال الكامل المتكامل؟
" إنّو أنا كتير بحبّ الفرانش والإنغليش... أصلاً كمان كتير بحضر سينيه!"
"حلو... أيّ نوع أفلام بتحبّي أكتر شي؟"
" إنّو أكيد بحبّ الـ BLU-RAY! صورتُن بتعقّد!"

٤. كيف ولا وزارة بتفهّم شو عم تعمل وإذا جرّبت شي وحدة تعمل شي، فجأة بيفرط مشروعا بسّ بينصرفو مصريّاتو؟
" طبعاً هوّي المشروع كان مناسب بسّ هلّق عم ينعمل دراسة لشي متطوّر أكتر."
" آه... طيّب ومصريّات هيداك؟"
" أوّل مرحلة من المشروع استنفدِتُن كلّهن بس أكيد رح نستعمل الخبرة اللّي أخدناها لنحسّن."
 

٥. ليش إستهبال الآخر/الكذب وصِل لمستويات رفيعة؟
" خيّي عن جدّ آي آم صوري على مبارح، كنت ِبميتينغ ضلّ للساعة ١٠"
" ميتينغ؟ولِه ما التقيت فيك على الساعة ١٢ سكران ووصّلتك على البيت! "
"أه..."

يركض هرباً بسرعة البرق -وكأنّه بِفعلِه هذا يهرب من الواقع المرير
ويرتطم بعامود كهرباء يوديه بـِ"كوما" فينيقيّة.


دامت أفراحكم.

* الغير حقيقية / المصطنعة / الوهمية / الخيالية

1 comment:

  1. leik Sama7, scénario laziz ktir, mitel hal balad akho heik w heik yalli mich 2drin ella n7ebbo law moumarasset cha3bo marrat bitkhallina netal3 mni tyebbna. Ktob ibni ktob, el kalem 7elou ktir bi ma7allo. bravo!

    ReplyDelete

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.