1.7.11

What I miss the most 9-Ode to a Mankouché - ملحمة منقوشية

تخايل حالك نايم ببيت بلبنان والشباك مفتوح وفي نسمة عم تتلاعب بالبرداية يلي فوقك، نومة بتسوى مليون... وفجأة في شي بدغدغ أحلامك وبخّليك تفوت بأحلام بعد أحلى،
بتوعى وبتتوجه صوب مصدر هالشي يلّي خلّاك تقوم من هالنومة الملكية،
وكلّ ما تقرب بصير هاللّغز يوضح، وآخر شي بيتجلّ المصدر قدّامك: منقوشة!
أخ يا ملكوت! شو هالإختراع العظيم!
 

شو هالشي يلّي في يكون ترويقة وغداء وعشاء! وكلو بـ 1500 ل.ل. إن شقّت حالها إلا بالمطاعم الفاست فود اللبنانية يلي عطول بجربو يعطو المنقوشة أسامي كلاس و كول تتصير ب-5000 لل- بس مش عم تزبط لأنو مافي متل منقوشة إم طارق !

بتقعد حول الطاولة، عليها أكيد: صحن لبنة وصحن بندورة، خيار، زيتون ونعنع.
يا عين صبّي كازوز! يلّا روح، إنطلق بِهالمغامرة.

برأيي الشخصي المنقوشة اللبنانية من أطيب و أبسط شي انخلق على وجه الارض،
منقوشة سخنة وبنجوس. عن جدّ الواحد ما بقّدر يّلي عندو يا وبمتناوله إلا إذا انحرم منّو ولو كان بسيط أدّ المنقوشة...
 

عطول منجرّب نروح لبعيد ونتفلسف: كروسان ومكارون، ودونتس وكوتيون وبيض وجامبون... كلّو فراطة...
بقول المتل "الكنيسة القريبة ما بتشفي" ، إيه أنا بقول "المنقوشة السخنة دواء !"

1 comment:

  1. oli_Vblog: man'ouché:
    http://vimeo.com/5595568

    sa7tein ;-)

    ReplyDelete

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.