20.9.11

ثقافة الـ"ميسد كول" / ويلٌ

يمكن لأنّو أصلنا فينيقي، دايماً منروح بتطوير وظيفة الأشياء لأبعد ما هيّي فعليّاً.
منعطي كلّ غرض وظيفة مقدّسة، سورياليّة، ما ورائيّة، ما معقول تخطر على بال حدا بهالعالم.

بدء الـ"ميسد كول" مع فجر التواصل الخليوي بلبنان.
كان الإنسان منتوف بحكم إنّو دفع ١٢٠٠$ لتأسيس خطّو و ٥٠٠$ حقّ "المكنة"،
فارتأى إنّو يعمل "ميسد كول" مقصود ليعبّر عن مجموعة مشاعر، حالات، أفعال، إلخ...

١. "ميسد كول" رجاع دقّلّي:
واضح وصريح، بيستعملو أكتر شي الخيّ/الأخت الزغيرة.

٢.
"ميسد كول" نزال:
واضح ومتّفق عليه سابقاً ضمن بند الصداقة، يُستعمل وطنيّاً.

٣.
"ميسد كول" وين صرت/يلّا مشي:
مبهم شويّ بس بيمشي، يُستعمل كتير في صفوف الشباب اللبناني.

٤.
"ميسد كول" الحبّ:
هبيله وغشيم، يُستعمل حسب المعادلات التالية:
 ٢٥ "ميسد كول" = بحبّك / ٥٠ "ميسد كول" = بتتجوّزيني؟

٥.
"ميسد كول" الـ"بون نوي":
أهبل وأغشم من يلّي سبقو،
يُستعمل في الحالات المستعصية.

٦. "ميسد كول" الساعة ٤ الصبح مع إنّو الشخص التاني ما بِكون معو رقمك:
 غامض وغشيم، بيجي كتحضير لـ
"ميسد كول" الحبّ.

٧.
"ميسد كول" شبّ "الديليفيري" لتفتحلو الباب:
واضح ودغري، يا فتاح الباب يا موت من الجوع.

٨. "ميسد كول" الكهربا:
واضح، صريح ومنوّر...
آه... مش سامعين في؟ إيه اسمعوا هالخبرية:
أخدت مكتب جديد وصرلي مقدّم طلب تركيب ساعة كهربا جديدة شي شهر.
حوالي الساعة ٣ بِرنّ خطّ شريكي بالمكتب
"ميسد كول"، سألني إذا بعرف الرقم وكفّينا شغل عادي.
بعد دقيقتين بِرنّ خطّي كمان
"ميسد كول" من ذات الرقم فرجعت رنّيت:
"آلو، مرحبا. حضرتك رنّيتلّي من هالرقم؟"
"إيه نعم.."
"مين معي؟"
"معك شركة الكهربا، وجايين نركّبلك هالساعة..."

-------

ويلٌ لأمّةٍ شركة كهرباؤها تستعمل الـ
"ميسد كول".

6 comments:

  1. hahahahahahaha!!!!! man its hilarious!!!!:D "yousta3mal wataniyyan" hahahahaha

    ReplyDelete
  2. min ahdam ma katabet ya ibni:) El kahraba killa bi lebnen m3aychetna bi alb el missed cal. Wlak akhhhh ya baladna chou lazizzzz

    ReplyDelete
  3. 3meltellak missed call la2ano 7abayt chou ketib :)

    ReplyDelete
  4. ١ "ميسد كول" أنا مشيت
    ٢ "ميسد كول" صرت عالمفرق
    ٣ "ميسد كول" نزال
    ٤ "ميسد كول" غود نايت !!

    ReplyDelete

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.