8.12.11

تِشتِك تِش

والله فهمنا إنّو موسم عياد، والكلّ مبسوط (أو عم يجرّب يكون مبسوط) وفرح وزينة ومحبّة وألوان...
بسّ  وحياتك، هالراديو اللّي بتعلّي بالسيّارة على عنينو... لَشو؟!
 

بتحسّ  إنّك "جغل"؟
بتكبر بِعين "الشباب"؟
بتشعر بالإيقاع عم يهزّ أوتار روحك؟
بتصير رجّال؟
بتحسّ حالك مالِكها؟
"بتشدّ" أكتر؟


 ما رح فيّي أُحصُر وأُحصي كلّ الأنماط والأشكال الُمتَّبعة والموجودة حالياً بالـ"سوق" اللبناني،
بسّ رح جرّب:

١. أبو الخوف/الفزع/الجماجم/إلخ...
إجمالاً موجود بكافة الطبقات والطوائف اللبنانيّة.
سيّارتو فيها تكون "بودي وطواط" أو "٤٥٠ ز" أو "رانج" وأكيد "فوميه".
بيتميّز بالـ"سيديهات" اللّي بتعيد خطابات "الزعيم" راحلاً كان أم حيّاً.
 
٢. شبّ التشتِك
إجمالاً موجود بكافة
الطوائف اللبنانيّة وبالأخصّ بالفئات الشعبيّة.
ما إلو سيّارة محدّدة ولكن بيِنشاف معظم الأوقات بِسيّارة من صنع ألماني.
بيتميّز بآخر المنوّعات "المُتشتكة" على شاكِلة ثقافتنا المائلة إلى الإنحطاط.
 
٣. شبّ الـ"بوم. بوم. بوم."
إجمالاً موجود بكافة الطوائف اللبنانيّة وبالأخصّ بالفئات الشعبيّة.
ينحصر بـ90٪ من الحالات بسيّارات تشبه الصناديق أو عِلب السردين.
بيتميّز بِتسكير الشبابيك وتعلاية الصوت "دوبل" وشِرب الـ"إكس إكس إل".
 
٤. شبّ الـ"أولديز"
إجمالاً موجود بكافة الطبقات والطوائف اللبنانيّة.
ما إلو سيّارة محدّدة ولكن بيِنشاف معظم الوقت بِسيّارة كلّ شبابيكها وحتى صندوقها مفتّحين.
بيتميّز بِمُرافقته للأغاني الأجنبيّة الخالدة والجواهر الطربيّة الشرقية.

 
ولِِه... ولِه صرعتونا!
لو بتركّبولكُن شي جوز "إير-فونز" بدِينيكُن مش أحسن للجميع وخاصّةً بموسم الأعياد؟

ملاحظة:
إنّ جميع الـ"موديلات" المذكورة أعلاه هي حقيقيّة ولا تمتّ للخيال بِصِلة.
كما أنّ عبارة "شبّ" هي مصطلح للتعبير عن حالة شبابيّة وليس عن جنس معيّن فما أكثرهنّ الـ"مدامات" المتشتَكات أو "أمّهات الخوف".

5 comments:

  1. Wa ya lil asaf l asifin ma aktaron,w khasatan enta w 3el2an bil 3ag2a,eh btentowich,kil man youghani 3ala laylah w fet7inla 3al 3aleh.

    ReplyDelete
  2. ma3ak ha2 miye bl miye! w b2arfoune ele kamen, bas ce sujet c'est du deja vu :P

    ReplyDelete
  3. bi3allo el sawt ibni 7atta ma yesma3o el dajij elli jouwetton, 7atta yehrbo min 7alet el taware2 el dekhliyyé. W a3yed bi 2loub le msakkara wel rouus el fadiyé ella mnil dajij !!!

    ReplyDelete
  4. ahla chab, chab el 90.5 ;)
    ad ma 3ala... ma byez3oj! :p

    ReplyDelete
  5. nd i agree with raschele ;)

    ReplyDelete

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.