5.1.12

الحق عالأبراج

مشاركة جديدة من صديقنا الكاتب والمخرج يوليوس هاشم! إنجوي!

لَ حدّ هون وبس... أنا أكتر من هيك ما بقا فيي إتحمل بصراحة!
بدي أعرف أنا شو خَصني إذا الريّس "أورانوس" قرر يكزدر ويدخل بالمربع الخاص بالمعلم "جوبيتر"؟! شو عاملّو أنا تَيخربطلي حياتي ويأثِّرلي على أمور العاطفة والعمل والعيلة والمال والزواج...؟!

قال كل ما تحرّك كوكب مناكل نحنا الضرب! يا قطيعة! أنا التحرّكات من الناس اللي حواليي وتأثيرا عليي مش عم بقدر لحّقلا، بدي لحّق ع تحرّكات الكواكب؟!
       
بالحقيقة ما كنت صدّق بالأول إنّو هالخبريات مظبوطة، وكنت مفكّر إنو حياتي أنا بتحكّم فيا، وعلى قد ما بجتهد بنجح، بِغضّ النظر إذا زُحَل زحّط على المشتري، أو إذا عُطارد ميَّل على دائرة بلوتو، بس بعدين رجعت سألت نفسي: معقول إنو أنا وحدي كون معي حَق، وتلات أرباع العالم حولي أكيدين إنو الأبراج مظبوطة وبيتابعوها كل يوم؟! ومعقول إنّو أنا بفهم أكتر من "العُلَما" اللي بيكتبو كتب الأبراج وبيبيعوها بسعر أغلى من "قاموس اللغة العربية- عربي عربي- عربي فرنسي- فرنسي عربي" اللي فيه أكتر من تلات آلاف صفحة؟! ساعتها قلت أكيد القصة فيها وما فيها! ومن وقتا وأنا خايف على شعوب العالم كلاّ لإنّو نحنا كِلنا مقسومين بس لَ 12 برج، يعني إذا الثور رح يكون يوم النحس عندو الخميس الجايي مثلاً، ساعتها لحّق على كَم تور رح يكون منحوس، ولحِّق ع بكي ونحيب من 1/12 من عدد سكّان العالم!! بس بعدين رجعت رقت شوي لإنو تذكّرت إنو في الأبراج الصينية وفي برج الفارة والبقرة والكلب والنمر والأرنب والديك والحية والحصان والنمر والتنّين والقرد والخروف، هودي رح يشيلو شوية حِمِل عن الحَمَل والأسد والثور والحوت والغابة كِلاّ!
       
ما بخفي إنّي تابعت شوي عن الأبراج الصينية ولقيت إنو هونيك في إشيا أحسن، بس المشكل إنو ما عرفت مع مين بدّي إحكي تَ إنقُل نفوسي عليها؟! لا الشمس عم بقدر حُط عيني بِ عَينا، ولا القمر بعدنا نحنا وايّاه جيران! طيب شو الحَل؟!

صرت عايش بِخوف كبير وما عم بسترجي إتحرّك بقا! حتّى بهاللحظة هيدي ضرب وجع راسي! بدكُن تقنعوني إنو هيدا لإنو بعدني بلا أكل؟! ما فَشَر! هيدا أكيد المريخ كان "مُشتَري" شي "زُهرة" لَ "نبتون" قامت "الأرض" وما قعدت!!

3 comments:

  1. amazing hahaha noway!

    ReplyDelete
  2. ليه هالمنجمين ما بيحكموا البلد يدل السياسين.. لأنو متل بعضن عايشيين كذب بكذب

    ReplyDelete

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.