18.2.12

! مرحبا Revoluçion

وصلت مواصيل توم إكسترا على كوبا وبعد ميّة واسطة وترجاية، قِبِل فريق توم إكسترا دعوة "فيديل" لتمضية أسبوعين عالجزيرة ومُشاركتو بجلسة "كوهيبا" من كعب الدسة.
رحّبت فرقة النوبة الهافانيّة الثورية الوسطى بِتوم إكسترا فور نزول الفريق من الطيّارة بحضور ممثّل "فيديل" (اللّي كان ممغوص نهارا) رئيس بلديّة هافانا: دون ميغيل دو فارنيينتي.
بلّشنا جولتنا السياحية على المناطق الكوبيّة المتعددة وتعرّفنا خلالها على شخصيّات كتيرة بتلخّص كوبا وكان أبرزها:


١- جرّاح هافانا وسكريتيره البرازيلي
كوبا معروفة بمدارس الطبّ عالميّاً بسّ الله لا يحطّ هالجراح بديار حدا! شو بدنا نقلّكن.... مواصفات عالميّة: سَمَار، هضامة، ذكاء، وسنان... إيه ما في سنان... دغري زلاعيم! وسكريتيره (أو "اللّزقة البرازيلية) موجود للتهييص حيث لا يجرأ الآخرون. يعني تخايلو معنا اتنين من أهمّ شخصيات المجتمع المدني الكوبي وبالآخر طلعو... أكيد... بدّن يبيعونا سيجار... وتاكسي... ونسوان... وبسّ سكّرت معُن غنّولنا "غوانتاناميرا" وتصوّرو معنا... بِبلاش!

٢- عذارى هافانا

سامعين بالأخطبوط؟ إيه تخايلو معنا ١٥٠ أخطبوطة شايفينكن دولارات عم تتغندر بالـ"نايت كلوب"، وكلّ أخطبوطة بسعرها! طبعاً لمّا شافونا مشروع فاشل، أكيد... جرّبو يبيعونا سيجار... وتاكسي... وبيرة... وبسّ سكّرت معُن غنّولنا "غوانتاناميرا" وتصوّرو معنا... بِبلاش!

٣- حربوق "سانتا كلارا"

نحنا كأجانب بِكوبا، ممنوع نستعمل باص الدولة (أو ما يُعرف بـِ"حنونة بتغرين" عنّا). حربوق "سانتا كلارا" زبّطلنا ياها. ما عرِفنا كيف وليش وشو صار إلّا وقت صرنا بالباص ومِشي فينا:
هيدا اللّي حاطط ديك على راسو، وهيدا يلّي لابس INPORIO ARAMI، ويلّي معو كيس بيض عم يلبّد على المقعد، وأكيد... يلّي بدو يبيعنا سيجار... وتاكسي... ونسوان... وبسّ سكّرت معو غنّالنا "غوانتاناميرا" وتصوّر معنا... بِبلاش!

٤- جغل "كايو سانتا ماريا"

صديقنا راوول صاحب تاكسي (بويك موديل الـ٥٦ معدّلة بِموتور روماني... خارقة). صعقنا راوول لمّا خبّرنا إنّو كلّ السيارات الجديدة صارت أوتوماتيك! أكيد على مدى رحلة الـ٣ ساعات ونصّ انفلجنا بِالعديد من الحقايق العلميّة والخبار الكتيرة وأهمّها كان: "يا حرام... أقلّ شي يكون عندكُن ٣ نسوان و٥ صاحبات!". جغل راوول ما هيك؟ روح يا "مونتيس دو أوكّا" إنت! أكيد بسّ وصلنا... جرّب يبيعنا سيجار... وروم... ونسوان... وبسّ سكّرت معُو غنّالنا "غوانتاناميرا" وتصوّر معنا... بِبلاش!

٥- بزّاقة "ترينيداد"

ضمن جلسة "فارنيينتي"* جماعيّة بلديّة بِساحة "ترينيداد" التحتا، دُهِشنا بمشهد سوريالي كان بطلو إله الـ"فارنيينتي": أوزابيو. هالزلمي كان بقمّة عطاؤه وسبق الجميع: كان عم يبزّق بين إجري لمدّة غير محدودة وعم بحاول بكلّ ثقة يصيب نفس النقطة... أكيد... بسّ خلّص (بعد شي ٦ ساعات وربع) جرّب يبيعنا سيجار... وروم... ونسوان... وبسّ سكّرت معُو غنّالنا "غوانتاناميرا" وتصوّر معنا... بِبلاش!

* الـ"فارنيينتي" (من الإيطالي far niente) هو فعل عدم أيّ شيء ويُعتبر هذا النوع من الأفعال من الرياضات الأعزّ إلى قلوب الكوبيّين
 
من بعد هالجولة الإقليمية، رجعنا إلى هافانا واستقبلنا رئيس بلديّة هافانا، دون ميغيل دو فارنيينتي (أكيد دون إلقاء أيّ كلمة إحتفالاً بالمناسبة) وسلّم توم إكسترا وسام قصب السكّر بِرتبة ثورجي ضدّ الأشياء والأفكار وبالآخر طلع... أكيد... بدّو يبيعنا سيجار... وتاكسي... ونسوان... وبسّ سكّرت معُو غنّالنا "غوانتاناميرا" وتصوّر معنا... بِبلاش!

-------

عاش فريق توم إكسترا الثورة وأمجادها ولكن كوبا الحالية عايشة فقط على أطلال هالثورة. زاحونا بهالثورة وبالآخر طلعو... أكيد... بدّن يبيعونا سيجار... وتاكسي... ونسوان... وبسّ سكّرت معُن غنّولنا "غوانتاناميرا" وتصوّرو معنا... بِبلاش!

"فيديل"... يا "فيديل"...
ترقّب ثورة إكسترا قريباً... ثورة توم إكسترا...
ومرحبا Revoluçion!

5 comments:

  1. i didnt understand the relevance of this post

    ReplyDelete
    Replies
    1. Consider it as a "world" genre post and it is relevant to a new experience for Toom Extra who's social revolution towards a better Lebanon is coming soon.
      I didn't understand the purpose of your comment.
      Could you please be more clear so we can answer you clearly?

      Delete
  2. tab u told us all about the "balesh" stuff... Yala we want part 2 all about "madfou3" stuff :D

    wish you new experiences always nd new posts about it! :)

    ReplyDelete
  3. very interesting post...you can understand the relevance when you have some culture about cuba ;)

    ReplyDelete
  4. Khayeh Antoine min ba3ed il kira2a ye3neh hata inta ze7etna bil taxi w cigar w neswein (N.B. kenet bfadel testa3mel kilmet Nasawin) , fi majeil tghanilna Guantanamera…

    ReplyDelete

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.