11.4.12

أبيض أبيض!

كان عنا فرصة 4 ايام عالعيد، قررنا نروح ع باريس مشوار بما إنو صرنا رايحين كتير وكل مرة منكتشف شي جديد. هالمرة قلنا هيت لنروح على متحف المجارير.
نعم! (بعيد من وجّكُن) مجارير!
نزلنا عالمتحف، شو ريحة عطرة... مش معروف، إذا خرى، على زبالي، على فيران...
"صوري" بعتذر، خلص، بسّ تخايلو حالكن قاطعين على الكرنتينا، إيه هيك شي الريحة.

بالمتحف، إنتحفنا والله، بيشرحولنا كيف حفرو وطلعو بفكرة يعملو هالمجارير تحت الأرض بسنة 1370، لأنو قبل كانو بالهوا الطلق وبلشو سكان باريس يحسّو بالخنقة والتلوث...
برجع بعيد 1370!
وشو كمان؟ بلشوا يكرروا الميّ المجويّة تتوصل عالبيوت نضيفة!

كنا 3 أشخاص من لبنان، وصرنا نتساءل شو صايرلنا بلبنان؟
كلنا نافخين ريشنا أنو أحسن جامعات وأحسن تعليم ويا لطيف ودكاترة، ومهندسين، و طزّ يا للّي! ولَو؟ ما تلاقى شي  نايب أو شي وزير، يحلّ مشكلة الكرنتينا؟ أو مشكلة النقل العام؟ أو مشكلة الفيضانات كل ما تشتي؟!!

آخر شي، طلعنا بنتيجة: الحق علينا.
صرلنا 30 سنة عم ننتخب نفس الأشخاص ومنرجع من نقّ!
أنا شخصياً ولا مرة انتخبت غير الورقة البيضة، بحقّلي نقّ وحاسب...
ومن هلأ ورايح منعتبر بهلة وغشيم وبلا ثقافة كل شخص رح ينتخب بسنة 2013!
بدكن بلد متل الخلق؟ بلّشو قاطعوا يلي ن**و  إختو!
2013 = ورقة بيضة

No comments:

Post a Comment

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.