1.8.12

dream on


الجمعة الماضية حلمت إنّو ربحت باللوتو.
شفت بالحلم ورقة اللوتو الربحانة، شفت كدست دولارات وشفت كمان طفل عم يدبدب ... يُقال إنو الطفل بالمنام بيجيب الرزقة.

أول ما وعيت رحت شتريت ٤ شبكات، ولعبت كمان باللوتو الفرنسي على الانترنت... قلت بلكي يا عمي بالمنام كنت رابحهم باليورو ونسيت انّي لحّقت اصرفهم بالدولار؟

خبّرنا الأصحاب والأقارب عن هالمنام بكلّ براءة... وكترو الأصحاب فجأة، وصار كلّ واحد شايفو مرّة بحياتي يعملّي مشاريع وصار بدو يصير شريكي... وما ضل حدا ما بدو ينتقل من الرينو سيس للبورسش بفضل منامي الواعد ودبدبة هالطفل المعتّر.

وبلّشت التحليلات السوريالية لتفسير دبدبة الطفل...
وهل يا ترى بلّش  دبدبة بإيد اليمين أو الشمال؟ (إذا الشمال بكون فال)،
وهل كان حاطط بافيت زرقا؟ (بتبعد العين)،
وهل كانو أسنانه طالعين؟ (بتكون الرزقة كبيرة... إلّا إذا كانت امّو عم تضيّف سنينية بالمنام)
وهل طوله أكتر من عرضه؟ (ساعتها بكونو الدولارات بالصندوق) 
إلخ إلخ ...

بلا طول سيرة، طلعت نتيجة اللوتو اللبناني، وزبطت معي برقمين... شحادة يعني... وباللوتو الفرنسي صبنا رقم واحد... حسّيتها شفقة مش أكتر.

خلاصة الحديث: يا أيها الشعب المتمرد، يا ريت بتخفّفو تضيع وقت وتحليلات بلا طعمة عن اشيا بلا طعمة، وبتركّزو على تعمير هالبلد سوا بلكي بيصير عنا مجال لنحلم ومساحة خضرا ليدبدبو الأطفال.

2 comments:

  1. حاجي تحلل وحياتك تسلملي تحليلاتك (زياد الرحباني)

    ReplyDelete

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.