20.9.12

Explosive Combos: الجزء الثاني

بالجوانب الغنية للمجتمع اللبناني، غير الثقافية والدينية والجغرافية، في جوانب دقيقة معروفة أيضاً بإسم "Explosive Combos".
الـ Explosive Combo بيِجمع بين شخصيّة من مجتمعنا وشيء من إختراعات البشر. هالخليط بيولّد كائن جديد ساحر...
هيدي تتمّة للجزء الأول يلّي كان بالإنجليزي.

١. فيل الـ"موبيليت"
نادراً ما بيكون صاحبنا وزنو أقلّ من ١٣٠ كيلو، مسلّح بـ"تي-شيرت" على قدّ الجسم بتبُرز حجم "كرشك الأبيض لَيومك الأسود" بالإضافة لـ"شورت" أشبه للشروال وأكيد شحّاطة "سبيسيال-موبيليت" بتساهم بالفرملة. هالوصف ما في شي فوق الطبيعة ونحنا منِحترم الإنسان شو ما كان وزنو وذوقو بالتياب بسّ يلّى خارج عن الطبيعة هوّي هالشقفة المبيّنة من مؤخّرة صاحبنا... شي شبيه بخليط الـ"غراند-كانيون" وغابة الأمازون. فعلاً منظر بِحَرِّك... الأمعاء!

٢. إمّ كيس لويس
خدودها مورّدة، عويناتها آخر موضة، جسمها لبّيس، والـ"Papi" ما بيرفضلها طلب. بتتعلّم بمدرسة ممنوع فيها العربي لأنّو  "نياعء... كتير فولغير"! وبسّ تنزل عالسوق... عفواً عالـ"Beirut Souks"، دايماً شنطة لويس مرافقتها.
آه، ما عرِفتو لَلويس؟! Louis Vuitton أو LV للفهمانين. ولك شو هالكيس اللّي حاملتي يا عمّو يلّى بِعلّم 10 ولاد بالثانوية الرسميّة مع أوتوكار!
آه يا إمّ كيس آه!

٣. دون فانيلّوني دي تريلّا
من أشهر الـcombos هوّي شخصيّة شوفير الكميون/التريلّا مع الـ"فانيلّآ". الله! بتشوفو معرّم ورا هالمقود، نافخ صدرو -بغضّ النظر إذا كميّة شعر الصدر كتيرة أو معدومة- عويناتو السود بيحكو عنّو وسيجارتو ما بتفارق تمّو. بترتبيّة الشخصيّات المؤثّرة بتراث بلدنا الحبيب، بيِجي دون فانيلّوني دي تريلّا  مباشرةً بعد فخرالدّين ويوسف بك كرم... "بليز دون فانيلّوني! بليز اهرسني بِكميونَك!"

٤. أمير الغموض

بيتكاتر هالمخلوق مباشرةً عند إنتهاء السنة الدراسيّة المدرسيّة. بِحكم إنتصارو على مرحلة المدرسة، ومن بعد ما يطبُل الدني زمامير وفرقيع وطبل وزمر ومواكب، بقرّر يتبنّى الغموض وسحر الشباب، فبياخُد كلّ يلّي مجمّعُن خلال السنوات يلّي مرقت وبيستثمر بعوينات Rayban. وفهمكُن كفاية... السجاد الأحمر بينفرشلو، الشمبانيا بتنزلّو، الصبايا بتركعلو...
بسّ يا بهلة بس! قرّب ليخك شي كفّ بركي بتفتح عيونك وبتفهم إنّو الحياة بعد ما دوّقتك المرّ، هيك بتترحّم على إيام الـ"gourde"!

8 comments:

  1. Awal wahda ahla b ktir.

    ReplyDelete
  2. !!!!! Ah ya si7 ahhh....Happy Birthday Sadi2e...
    STAR !
    PS: R for Run ;)

    ReplyDelete
  3. HAHAHA! هودي خرج bandes dessinées, super extra mais la dernière est la meilleure, imagine la limousine, tous les accessoires nécessaires et l'un après l'autre en descendant de la voiture !!!الكف ناطرن واحد ورا التاني. Toujours aussi fin et sympathique dans ta critique:) Keep writing ibni!

    ReplyDelete
  4. No 2 and 4 are hilariously true !! :)
    Good job !!

    ReplyDelete

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.