2.10.12

وان نحن اتحدنا نكتب المستقبل ويرحل المساء ...


قدّمت استقالتي من شغلي الحالي وهيدا آخر شهر. بعد سنتين شغل، بتذكّر أوّل ما بلّشت بهيدي الوظيفة وكل صدمة أكلت. من بعد ما مضينا "الكونترا"، بعتولي بالبريد (أكيد) كارت مشان التنقل بالقطار (أكيد) بأسعار مخفضة. مع إنو بروح عالشغل مشي، وبس بلشت خبّروني إنّو بيطلعلنا نصّ ساعة "مساج" بالجمعة، في "مدلكة" بتجي خصوصاً كرمال هالشي، مشان يخفّفو توتّر الموظفين، شو كمان غير الـ6 اسابيع عطلة بالسنة، والدقيقتين "over time" المحسوبين، ويوم يلي بشتغل السبت عندي  نهار فرصة بالجمعة، وفي كمان شخص مسؤول عن الوضع النفسي وهيدا الأربعة بالذات كل موظف عندو مقابلة 45 دقيقة مع شخص مسؤول عن الـ"ergonomie" يعني إذا الكرسي بتناسبنا، وكيف لازم نجلس مظبوط مشان وجع الظهر، مع إنو في مساج نهار الخميس!  وإلى آخره ...

هلّق أنا تركت لأسباب شخصية، بس صراحةً هيدي شركه بتحترم حالها ونحنا 60000 موظف بسويسرا، مش دكانة يعني... بفكر عطول بوضع العمال بلبنان، مسخرة صحيح، شركات أجنبية، شايفة حالها، وبتفتح فرع ورا التاني، ويمين يشيل... ما بتأمّن ضمان للموظفين، ما في شي إسمو فرص، الموظفين بيشتغلو سبت وأحد، للساعة 10 أوقات، وما مننسى الأعياد، والتنزيلات، والالف ضربة سخنة! عيب والله، هالعمال عندن عيال، صحيح لازم يشتغلو تيعيشو، بس مش لازم يشوفو ولادن عم يكبرو، ياخدو فرصة شي جمعة، أو يعرفو إن في ضمان إذا كسروا إجرن، وين الرقابة؟ مافي حداً يجي يشيل السيجار من تمو لهيدا يلي عامل حالو مدير، ويحطو بشي مستودع يحمل كراتين كل النهار بركي بحس على دمو شي مرة.

نحنا علينا كشباب ناشط، نقاطع كل شركة، كل سوبرماركت، كل مكتب، بِعامل الموظفين بهالطريقة... المقاطعة نوع من الثورة السلمية وعندا أثر كبير... بفضّل 100 مرة اشتري من دكانة أبو طوني وما شارك بالجريمة يلي عم ترتكب ضد العمال اللبنانيين.
وإنتو شو عم تعملوا لتحاربو هيدا الشي؟

2 comments:

  1. You post something like that on FB , you will get 100000 like from lebanese youth. Those same youth are teh one following our great leaders, the war's king .....fighting their other lebanese fellow because he is following another great leader , that doesnt like his great leader...we are sooo busy following the non followers of our great leaders to be concerned about what really matters.
    what am doing about it ? am leaving ....

    ReplyDelete
    Replies
    1. yeah liking smtg on fb is easier than acting and taking part of a revolution...Don't leave, lebanon needs us !

      Delete

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.