12.12.12

رجع اللقب...

طيب ما يا زلمي هيك خبار ما فيك تخبّيا علينا!
كيف بدنا نحتفل و نعمل كم رشق، و نكب فتيشة تولّع الحي؟ 
والله انا مش حاسّة على شي، إنّو كنت عم بلّش شكّ بس ما تهيّألي ابداً...
قال شو، اسمعو هالخبرية: رجع لبنان سويسرا الشرق! 

كتير تفاجأت صراحة ومع إنّو صرلي شهر هون، لا حسّيت ولا انتبهت.
بعدا العالم بتوقف وراك بالبنك ورح تعدّ معك المصاري او تقّلك مثلاً: "يا زلمي خلّيها علينا"! 
بعدا الميّ بتنقطع مرة بالجمعة ومن صير مجبورين نختار اذا منتحمم او منغّسل التياب أو منجلي الجَليات. 
بعدو السير واقف بالاشرفية لأنّ في حيوان قرّر يصفّ بنصّ الطريق... ما "يلا بسّ دقيقة وراجع والله!"

طيب ما كيف؟ إنّو يا خيّي قلتلي رِجِعلنا اللقب، بس ما فهمت كيف؟
آآآآآن... مستوى المعيشة والاسعار!
هلّق لاحظت إنّو بسّ تشتري أغراض من السوبرماركت بيطلع المجموع متل بس تشتري بسويسرا، أو بس نضهر نتعشّا أو نشرب كاس، ما عم تفرق كتير يعني...
وفواتير التلفون؟ رعب! والكهرباء والبنزين والتياب والـ، والـ، والـ ...

وكل هالغلا بمعاشات لبنانية، معظمها ما بتوصل للألف دولار!
طيب ما كيف عايشة العالم؟ كيف عم بلحّقو قسوطات جامعات وسيارات وتفنطز و أكل خرى؟
سؤال بطرحو على نفسي من ٣ سنين وبعد ما لقيت الجواب، حدا يساعدني افهم...

يا حبيبي إذا بدّو يرجعلنا اللّقب بسّ لأنّ البلد صار غالي ومش لطبيعتنا الحلوة وللطرقات والاخلاق والصحة والسرية المصرفية...
ولك عمرو ما يكون هاللقب! روح علقو على الماتيرهورن* وخلّيا سويسرا مبسوطة في!

N.B: ما عم نقّ، عم إحكي الواقع بعدني بحبّ لبنان.
* الماتيرهورن: إحدى أشهر قمم جبال الألب الاوروبية، بتمتدّ على حدود سويسرا وايطاليا. 

1 comment:

  1. سويسرا الشرق غير سويسرا الغرب ! لأنو الشرق غير الغرب ! و ليش بدنا نقارن الإثنين ؟ ما بحياتو الشرق كان متل الغرب و لا الغرب متل الشرق ! و يلي بدو يقارن بين الإثنين على أساس أن الغرب مرجع بكون عم يغلط !

    اللقب "سويسرا الشرق" مرتبط بالسرية المصرفية، مراكز التزلج، الحيادية أو عدم المواجهة السياسية !

    أما الوضع المعيشي والنظام مرتبطين بثقافة اللبناني المشرقية ومن هون زدنا كلمة "الشرق" على سويسرا لأنو بهل المجلات اختصاصنا مشرقي !

    أما ما وراء البوست نرى رغبة بأن يكون لبنان كالغرب من ناحية النظام والثقافة ! ولكن بنظري الشخصي وبكل تواضع، إذا تمثلنا بالغرب نكون رفضنا خصوصيتنا ! أما كيف نجعل النظام سائد والمستوى المعيشي أفضل من دون أن ننكر نفسنا فهذا موضوع أخر يحتاج لمناقشة سوسيولوجية وإجتماعية وسياسية وتاريخية طويلة !

    T.C.

    ReplyDelete

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.