22.12.12

كلّ سنة وإنتو بخير!

سنة عم تقلب، ولو شو قطعت بسرعة!
بكل ّعجقة الأعياد (اللي معظمها عجقة فرجة مش أكتر) مننصحكُن تاخدو هالوقت الضايع بالسيارة لتتذكّرو الإشيا الحلوة والبشعة اللي صارت بالـ٢٠١٢، الأوّلة لتنعاد والتانية لتتعلّمو منها.
كمّ نصيحة إكسترا لكلّ الأذواق لتصير هالفترة أهضم:
عجقة سير مش طبيعية؟
تمام، افتحو الشبابيك وتعرّفو على هالبشر حولكن.
ما لحّقتو تشترو "بوش دو نوال"؟
يا لطيف، شويّة فواكة مجفّفة وملبّس على قضامة والسلام!
بعد ما اشتريتو هدايا؟
ولا يهمّكُن، أكتر شي بتكتبو ورقة عليها كلمة حلوة مع تاريخ إستلام الهدية بعد الأعياد (رح يضحك الشخص المعني ويتشوّق أكتر للهدية).
ما في مصاري تشترو هدايا؟
أحلى شي! فيكن تهدو الشخص اللي بتحبّو خدمة أو بوسة أو غمرة أو مساج!
ما بتعنيك هالفترة وما بتحبها؟
ماشي، حقّك! فيك تبوّم لحالك واترك الباقيين مبسوطين بعجقتهن!
شايفني كتير متفاءل وعم يزعجك هالشي؟
ولا يهمّك، فتاح موقع إخباري وصدقني دغري بترجع عالمرارة اللي معوّد عليها وشكلك معلّق فيها.

في أحلى منها ينقلب التعصيب والسمّ من العجقة والغلى والخفق لضحك؟
وحياتكُن ما في شي بيحرز، ولِك نهاية العالم وزمطنا منها!
منتمنّى تضلّو بصحّتكن ودايماً مع الناس اللي بتحبّوهن :)
عيد ميلاد مجيد وعام سعيد، وكلّ سنة وإنتو بخير!

No comments:

Post a Comment

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.