21.11.12

Kinder Surprise

يعني شو بدو يحكي الواحد... ما بعتقد مرق بتاريخ الأرض وتاريخ جميع المجرات بلد بيشبه لبنان... شي غريب...

لبنان متل كيندر سوربرايز... لبنان بلد المفاجآت...
بتعرف إنو لبنان كيندر سوربرايز بس يكون بعلمك ما في شي، والحياة حلوة، وإنت رايح على شغلك متل كل يوم... شوي بيطلعلك عجقة سير من حيث لا تدري... وبتاخد معك ٤ ساعات من بيروت لجونيه...
إنو ليش مثلاً ما حدا كان عارف إنو مسكّرين الطريق بهالنهار كرمال تمرين الجيش للعرض العسكري لعيد الإستقلال؟ إنو ليش السوربرايز ع بكرة الصبح؟ ودخلكن مين بيحضر العرض؟ أنا شخصياً آخر مرة حضرتو كنت بصف الـ"ويتيام"...

بتعرف إنو لبنان كيندر سوربرايز بس توعى ع بكرة الصبح وتلاقي إنو الطريق قدام بيتك صارت أدغال... حفّّروها هيك بلا ما تعرف ليش وكيف... بس بتعرف إنّو ما رح يسكروها قبل ٣ سنين...

بتعرف إنو لبنان كيندر سوربرايز بس تكون عم تتحمّم، وإنت وعم تليّف تحت باطك، بتنقطع الميّ... وبتصير تفكّر كيف بدّك تشطّف هالصابون... والسوربرايز الأكبر هيّي إذا كمان بلحظتها انقطعت الكهربا...

بتعرف إنو لبنان كيندر سوربرايز لمّا بعلمك ما في شي ومولّعينها وسهر وطقّ حنك وكاسك يا أشطة، وإذ بخبّروك إنو بلّشنا حرب، أو إنو إبن عمّك فتح جناح عسكري للعيلة، أو إنو طلع إنفجار حدّ بيت خالك...

المهمّ، أكتر شي بتعرف إنو لبنان متل اللعبة تبع كيندر سوربرايز بس كل وحدة من هالقصص تسلّيك مع إنّو ما مفروض، وبترجع بتبلعها مع إنّو ما مفروض، وبتخنأك شوي مع إنّو ما مفروض... وبتزمط منها إذا حظّك حلو وبتنسيها بعد كم يوم مع إنّو ما مفروض....
بوينو؟

16.11.12

إيديولوجية الترقيط

قبل ذكرى الإستقلال بشوّي، دارت براسي هالفكرة:
شو هالسرّ يلّي بِخلّي عنصر بأيّ جهاز أمني لبناني لابس بدلة مرقّطة أو مواطن عادي بأكسسوار "مرقّط" يفتح على حسابو؟

إنت يا "Vin Diesel" الشرق والله، بعدك فايت عالدرك، وبدلتك مبهبطة عليك... ولو حبيبي ليش بس تطلع بهالـ "دودج تشارجر" (اللّي عليها "999" على القزاز ورا, بسّ إذا عزناهُن ما حدا برِدّ) ما بِعود شي يوقف بوجّك: لا إشارة ولا رصيف ولا بيك-آب ولا سير كلّو جايي بعكسك!؟

وإنتو يا "وطن"، على راسنا وعيننا بس كلّ ما شوف مجموعة منّكُن بـ"هامر" بحسّ بتصيرو شايفين العالم برغش ولو رابع خطّ دوبَلتو لازم نضرب تحيّة ونستحي حتى نتطلّع!

منوصل لـ"رامبو"، معو شأفت "رانغلر" من عمر جدّي، بس يطلع في ولابس الـ"جيليه" المرقطة (شغل الصين أكيد) بتقول نزل المجوقل عالأرض وزيحو يا شباب... إجا النسر!

وإنتي يا مدموزيل يا عيّوقة، يا جوهرة بعيون الماما والبابا والتيتا والجيران وشباب الحيّ والمنطقة كلّا، هيدا المرقّط طالع عليكي شوي (بسّ شوي) "فولغير"... إنّو لو مستور، نصّ مصيبة، بس هيك مبيّن كأنّك هربانة من شي حديقة حيوانات!

يا ريت اللّي لازم يكون أمثولة بالأخلاق ببلّش بِحالو وبيتذكّر إنّو البدلة المرقّطة مربوطة دغري بالوطن...
أمّا رامبو والمدموزيل العيوقة... هودي أصعب وضعُن...

ويلٌ لأمّةٍ ماشيةٍ على بهورة الترقيط.