17.1.13

حوار فتّوش ١

حوار فتّوش عبارة عن أحاديث واقعيّة تجري بين أعضاء فريق توم إكسترا.
نتمنّى أن تتمتّعوا بقراءتها!
-------
سماح: دخلِك؟ شو في قايمين القيامة؟ في رجّال مات بالشارع من الجليد أو شي هيك؟

*بعد مرور بضعة دقائق*

سماح: رنا؟ غفيتي؟

*تجيب رنا وكأنّ شيئاً لم يكن*

رنا: ايه هيك خبروني، مات علي، كان يبقى يقعد على مدخل الجامعة الاميركية ببيروت
سماح: أوف! هوّي بيشتغل هونيك يعني؟
رنا: ما حدا بيعرف... بس إنّو بتعرف كيف لما واحد يموت - بعيد الشر عن قلبك - بتبلش تطلع الاخبار بلبنان... 
سماح: الله يرحمو... بسّ إنّو هيك شغلي بعد بتصير يعني؟ إنّو واحد يموت من الصّقعة بشارع بنصّ دين شارع ببيروت؟
رنا: حبيبي العالم عم تموت من الصقعة هيي وقاعدة عم تحضر التلفزيون، كيف تا واحد قاعد بالشارع! بتضحكني أوقات بعدك بتتعجب... ليش وين عايش إنت؟
سماح: أنا عايش بمزرعة يشوع... هاهايز!

*يحسّ  بالسخافة ويُكمل*

سماح: عن جدّ هلّق، إذا كان معروف هالقدّ هالمعتّر ليش ما كان حدا يساعدو؟ ولّا  مبسوطين في عامل جوّ قدّام المدخل؟
رنا: هلّق في ناس صارت تقول أنو جربو كذا مرة يساعدوا بس هو ما بيقبل. شو بعرّفني... بتسألني اسئلة كأنو انا بعرف، كل شي عرفتو انو صار اسمو شهيد وعملو مظاهرة وصار في مطالب من الدولة للإهتمام بالأشخاص المشردة...
سماح: والله هالقدّ؟ طيب عال، شي منيح... بس المهمّ ما تكون الخبريّة كلّها مبنيّة على عواطف وبسّ... متل وقت ما يموت شي مطرب أو مغنّية وبِبلّش الزجل والأشعار والعواطف الملهلبة على فايسبوك وعالتويتر وبِكي ونحيب!
رنا: حبيبي نحن شعب عاطفي. هيدا الحلو فينا تخيّل لو كنا شعب عملي....تخيلّ ملّا  لبكة!
سماح: لبكة كبيرة! منصير مثلاً بدل ما نكرّم الشخص المبدع (شو ما كان نوع الإبداع) وقت يقرط موتة ويتختخ ونستفيد على ضهرو ونعمل كوكتيل، منصير نكرّمو هوّي وعايش! وإذا كان عايش، منستحي نعبّر عن العواطف!
رنا: انت مش عم تفهم...في متل بقول: ما بتعرف قيمة اللي عندك إلّا بس تفقدو، فنحنا ما بدنا نزعّل حدا وبدنا نطبّق المتل... هيدي هي مش اكتر
سماح: صايرة فيلسوفة أكتر منّي!... برافو. طيّب ليكي؟ سامعة بالـ"إستراغون" (Estragon) شي؟

*تُصعق لسماعها هذا السؤال السخيف/الغريب وتجيب بتردّد*

رنا: هيدي عشبة؟
سماح: إيه... بتلعّيلي نفسي! إنتي شو بِلعّيلِك نفسِك؟
رنا: ممم... قرط الحكي عالفاضي، "حبيبي وتقبرني وتسلملي، انت متل اختي" ...و بعدين بيبزقوا بضهرك! هيدا الشي بـ لعّي متلاً
سماح: إيه... بس مش قدّ الـ"إستراغون"!... طيّب، شفناكي... سلّمي عالمحروس وبلّغي إنّو "جيلدا" بتسلّم عليه!
رنا: حبيبي كل واحد بتلعي معو على قد نفَسو... سلامك يوصل... بس بعد ما قلتلي مين "جيلدا"؟

*ترعُد السماء وتنقطع الكهرباء وتبقى "جيلدا" مجهولة الهويّة*

No comments:

Post a Comment

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.