28.3.13

شعنينة إكسترا!

- آلو؟
* ولِك أهلا بالجارة!  يلّا  حطّي الركوة أنا نازلة.
- ‫بلا ركوة بلا بلّوط! هلّق بدّي إحكي! ولي شفتي سهام نهار الشعنينة؟!
* ايه شفتا! حاطّا هالقبوعة فيا ريش ع راسا مفكّرتلي حالا ماري-انطوانيت!
- ولي ‫وقفت عالريش؟! إنتي شفتي كرشا بهالفستان المزَومَك؟ وما لاقتش غير تنإّي أصفر!
* هيدا ع اكل المعمول، هيديك الجمعة كانت مِن تعملون، وحدة بالعلبة واربعة بتمّا!
- ‫أشي هالملّالة هيدي... يا حرام ولادا، متل هالصيصان المنتوفة لاحقينا وجوزا راكد وراهُن...
* معتّر هالأنطون... ‫وشفتي ولاد جانيت؟ كل وحدة لابسة فستان، كأنو رايحين عالكرنفال، وخِدي على تتإيس صور بهالتليفونات!‬
- أيّا كرنفال، سيرك إنتي الصادقة! متل السعادين من ينطّو من شبّ للتاني قال ليتصوّرو معو ويحطّو الصور عالـ "تيس أبوك" مدري أشو!
* بإيامنا ما كانش في لا "تيس بوك" ولا سرامي عتيقة! كنا نروح نقدّس ونرجع عالبيت. هلّأني بين الشمعة اللّي عليا ريش، والشمعة اللي عليا خرز، ضاع العيد والمعنى...
- ولك يسلم تمّك! موديليت وشكال وفنطزة وللأيش؟! ويا ريت هالولاد حاملين هالشمعات، مدام سهام وصاحبِتا معربطين فيهن!
* ايه واذا مش المدام حاملتا، بتحملا السرلنكية. قال عيد قال، وتواضع! كلّو صرلو شهرين بحضّر بهالتياب!
- ولك يلّا... ماشي الحال، المهمّ الملّالة ما معستش حدا!‬
* يقصف عمرك إنتي وخبارك! أيشك مهضومة وعيّوقة!
- إنتي المهضومة يا جارة وأهضم شي بين هالناس كانو هالولاد، أفيش أحلى منُّن!
* يا حياتي عالولاد، كلُّن بضوّو متل الـ"بصبوص بو فعالة"!
- ما أهضمك صحيح! ليكي، ما إلتيليش هلّق؟ ما كانش حلو الـ"تايّور" تبعي؟‬
* ايه والله تايور غير شكل! وين مخيطّي دخلك، عند ايفون مرت الياس الكندرجي؟
- مزبوط! منّكش هينة! بس دخلك؟ وين شفتيني لابستو؟ ما شفتكش بالساحة ولا بالكنيسة، ما نزلتِش؟
* له! ما لقيتش شي إلبسو!

3 comments:

We allow comments without moderation on our blog, just because we respect your right to answer back and give your opinion, but in return we expect that you comment responsibly and respectfully.