22.5.13

لأمتين؟


لأمتين؟ بدنا نضل عميان؟ ناكرين يلي عم بصير ببلدنا، لأمتين بدنا نضل شايفن حالنا؟ أنو نحنا اللبنانيي عايشين، ما بهمّنا يلّي عم بصير حوالينا... انو  يابا شو؟ نحنا تعودنا... الانسان إذا بيتعوّد على ريحة الخرى، بتبطّل تزعجو بعد فترة، وبصير الخرى منّو وفي... ومبسوط غاطس بالمجرور وعم يضحك.  إيه، ما نحنا فينا ننزل عالبحر ونطلع عالجبل بـ 30 دقيقة...

نزلنا بالـ٢٠٠٥، هوبرنا وطالبنا بإستقلال لبنان من النظام السوري، عملنا شي... كبير يمكن... مابعرف... بس لبنان قبل، ما يستقل من أيّ  نظام خارجي، لازم يستقل من هالنظام الداخلي، من هالباكتيريا يلّي عم تمصّ الدم من هالبلد، وما عم تخلّي يعيش... كلنا من سبّ بالبلد، شو ذنبو بلدنا؟ الحق علينا، نحنا وصّلني لهون، من ورا جهلنا وهبلنا...

ما تفكرو عم نظّر من بعيد، أنا راجعة وبدي أعطي فرصة لهالبلد، لأنّو حبي إلو، أكبر من حبي لحياتي ولضهراتي. لبنان عايز كل شخص منا، يحبّو ويفكر إنّو هيدي الأرض يلي استقبلتنا نحنا شو عملنالها؟ كيف عزّزناها؟

هلأ جايي الصيفية والمهرجانات والـ"سكاي بارات" والـ"بيتش-برتييات" والكلّ بيخلع وبهزّ بس كلنا بدنا خلع كفّ وهزّ... دماغنا بدّو هزّ!

بسّ فكّرو، إذا كلنا مننزل عالأرض نهار، من شلّ النظام، الحركة، بطريقة سلمية أكيد، من طالب بإنتخابات، مننتخب ناس جديدة مافي دم وسرقة على إيديهن. ليش ما منفكّر شو أحسن شي لبلدنا قبل ما نفكر بحالنا؟

البلد بشعبو بس نحنا ما منستاهل بلد.